مع لينك انت فاصل

لينك تعتبر شركة الانترنت رقم واحد فى مصر من حيث عدد المشتركين وده بيرجع لسببين انها تقريباً مغطية مصر كلها بعكس تى داتا واللى بتمتلك 70 % من سعة الانترنت فى مصر والغريب انها بتغطى المدن الرئسية بس ( يافرحتى )! والسبب التانى ان تى داتا حاجبة كل المواقع المعارضه للنظام فى مصر وكمان بتتجسس على المشتركين . نرجع للينك ونبدء من الاول خالص
البداية لما تروح تقدم على خدمة وطبعاً لو انت من خارج القاهره والاسكندرية فى الحالة دى حتتعامل مع وكيل لشركة لينك طبعاً الموضوع بسيط خالص انت بتقدم اخر فاتوره للتليفون الارضى وبتدفع اشتراك شهر مقدم + عمولة الوكيل وهو وضميره طبعاً السؤال العفوى اللى بتسألو فى الحالة دى هى الخدمة حتشتغل امتى والرد الطبيعى اللى هو ان الخدمة حتشتغل خلال عشرة ايام وانت زى المسكين بتصدق والعشر ايام بيخلصو وبكره بعده وبعد بعده وتلاقى الموضوع دخل فى شهر وده لو كنت محظوظ لان فى ناس تانيه مابيكونش فى اماكن فاضيه فى السنترلات بتعتهم وبيفضلو منتظرين حد يلغى الاشتراك بتاعه عشان يدخلو مكانه طبعاً ده بيكون فى الارياف وممكن تنتظر ست شهور وانت ورزقك
المهم بعد ماالخدمة تشتغل بتكتشف ان النت عنده شلل اطفال ماهو المفروض انك مشترك فى سرعة 512 وبعدين تلاقى سرعة الدونلود من 4 لـ 8 كيلو والصفحه اللى ماتكملش 800 كيلو بتاخد تحميل من 30 لـ 40 ثانيه وبعدين تتصل بخدمة الدعم الفنى وهنا بيكون فى ردين متوقعين الاول لو انت اول مره تتصل تلاقيه يقولك ان الخدمة حتظبط فى خلال 48 ساعة ولو انت قديم معاهم تلاقيه يقولك انه بعت شكوى للقسم المختص والخدمة حتنظبط فى خلال 4 ساعات ( وابقى قابلنى) وبالمناسبة حصلى موقف طريف لماالنت عندى كان فاصل واتصلت بالدعم الفنى ورد عليا بأن الخط شغال تمام من عنده وانا رديت عليه قولتله انى اجيب الجهاز بتاعى واجى اقعد جمبك ! بعد كده تكتشف ان مفيش فايده وانك بتضيع وقتك وكمان بتخصر مكالمات على الفاضى واخر الشهر بتلاقى نفسك بتدفع مكالمات للدعم الفنى اكتر من اشتراك النت نفسه وده حصل معاى شهور كنت بدفع حوالى 120 جنية مكالمات واشتراك 95 جنية والمحصلة نت شبة فاصل .
نيجى للوكيل وانا قعدت سنتين ادفع 25 % من قيمة الاشترك عمولة للوكيل لحد ماالخط عطل مره وبعتولى واحد وبعد ماشغل الخط طلب منى رسوم الصيانة طبعاً السؤال اللى ان سألته الـ 25 % اللى انا بدفعهم ايه لازامتهم والاجابه كانت عشان الاعطال والصيانة وهنا قررت ادفع الاشتراك بدون عمولة طبعاً الوكيل رفض وانا صممت على موقفى لان اكتشفت انى بدفع الصيانة مرتين
ومش بس كده كمان فى شهور الوكيل بيتأخر فى دفع الاشتراك للينك وهنا بتتعرض ان الخدمة تقف وتلاقى بيطلعك رساله ان تم ايقاف الخدمة لمدة ساعة دى فى اول مره وبعدين تتصل بالوكيل يقولك ان حيسدد الاشتراك بتاعك دلوقتى تانى يوم تلاقى تم فصل الخدمة لمدة ساعتين وبعد كده يطلعك الرساله الغبية بتعت لقد تم ايقاف الخدمة والحجة الوحيده للوكيل ان السيرفر مهنج وانه ماعرفش يسدد الاشتراك وتبقى كملت لو الكلام ده كان يوم خميس يبقى عندك خميس وجمعة وسبت اجازة فى لينك وتستنى ليوم الاحد عشان الخدمة تشتغل تانى وبغض النظر عن الشكاوى اللى حتقدمها للينك فى الوكيل لانها فى النهاية مابتجبيش نتيجه غير انهم يقلولك حنحقق فى الموضوع ونتصل بيك وابقى قابلنى لو حد عبرك .
كمان انا تقريباً جربت كل السرعات بداية من 256 مروراً 512 وصولاً لميجا بس اللى لفت انتباهى حاجة واحده انى الفرق فى الثلاث سرعات هى انى كنت بدفع فلوس اكتر والسرعه بتفضل زى ماهى .
بعد كده بتكتشف ان لينك دى قدرك اللى مش ممكن تخلص منه وده لسببين الاول ان مفيش غيرة بتغطى مصر كلها والسبب التانى لو انت ساكن فى مدينة رئيسية وحبيت تشترك مع شركة تانيه لازام تحصل الاول على جواب انهاء الخدمة من لينك ومن خلال التجربة اتضح ان الهجرة لكندا اسهل من الحصول على الجواب ده .

ملحوظة : تم اضافة صوره مش من تصميمى